كيف ممكن اساعد طفلي يتخلص من البكاء كوسيلة تواصل وتحقيق مطالب من عمر الثالثة الى السادسة ..

نتفق على نقطتين ..
البكاء عند الطفل لغة ،، منذ طفولته الاولى كانت لغته ما دلع .. ما سلاح جردي بكاؤه من المعاني السلبية دي أولا ..

النقطة الثانية طفلك بتواصل معاك ومع العالم ويتفاعل حسب متطلبات مرحلته العمرية والمهارات المتعلقة بيها يعني ماتطلبي من طفل الثالثة يفهم بذات قدرة واستجابة ذو السبعة او عشرة اعوام …

طفلك احتياجه العاطفي الاول الأمان ودا تحديداً لازم يكون ثابت ونحن بنطور طرق الحوار واللغة معاه ..

الطريقة الاولى التدريب على الحوار ..

لما يبكي طفلك وهو بيطلب شئ مادي او معنوي اسمحي ليه بكم دقيقة بكاء بعدها ابدئ حوار .. انت حتتكلمي وهو حيواصل بكاء كملي كلام عادي كلام مطمن انك عايزه تساعديه لكن محتاجة تفهمي مطالبه..

حديثك بنبرة صوت ثابتة هادئة واضحة ومتعاطفة ..
لازم نبرتك تكون ثابتة طيلة الحوار عشان يفهم انك جادة في محاولة فهمه وكمان ماحتتخلي عن محاولة فهمه ..

اطلبي منه يوقف بكاء ويستعمل الكلمات شجعيه بتكرار جملة زي انا عايز .. وكرريها يا ماما انا عايز .. ممكن جدا يواصل وصف بالبكاء وكلمات غير مفهومة او ممكن يحس بالغضب واصلي حوار لكن زيدي التعاطف امسكي ايده طبطبي على كتفه امسحي راسه .. وواصلي كلام “حبيبي لازم تتكلم عشان افهمك واساعدك ..”
اذا المطلب مقبول وافقي وما لازم طوالي تقن المهارة ويبطل بكاء نحن بدأنا للتو ..

بالتدريب ويوم عن يوم بخطوات صغيرة حيتغير السلوك وحيكتسب مهارة الحوار ..

الطريقة الثانية ..

التجاهل المشروط بالحضور.. يعني شنو مشروط بالحضور ..؟؟ وجودك في نفس المكان مع طفلك مع حضور معنوي يسهل على الطفل فهمه لكن بدون تواصل ..

انا جنبك هنا لما تبطل بكاء وتهدا نتكلم ،، و تكرريها بعد فترة ،،لكن فيما عداها حتكوني صامتة بدون اي تفاعل مع بكاؤه وغضبه سواء كان سلبي ولا ايجابي ..
اذا بدأ يهدا اسأليه اذا يحب تحضنيه او تمسكي ايده وطبطبي عليه هدئ روعه وقولي جملة انا عايز ..
اذا واصل بكاء وغضب واصلي صمت وهدوء وفقط وراقبي..

بنستخدم الطريقة الثانية اذا كان الطفل عارف قاعدة المنع مسبقاً ومتفق عليها أو كان بيطلب شئ مؤذي او غير مسموح يأخذه
حتكرري جملة انا اسفة ياماما انا عارفه انك زعلان لكنه غير مسموح وبعدها الكلمة السحرية عايز بدله بشنو ..

الإستبدال واحد من اسرار التربية الصحية ..

التجاهل المشروط بيحسس الطفل بالامان وانه من حقه يطلب لكن بطريقة افضل مفهومة اكتر ..

ماتجبري طفلك يستخدم اللغة وماتفقدي اعصابك وانت بتدريبه ..
المرونة الصبر الدعاء ..

ماتقلدي بكاؤه ما تسخري ماتهددي ماتأنبي .. اظهري تفهمك ودعمك

اغلب الاطفال البيتأخر تطور اللغة والحوار عندهم بيكون السبب طريقة الوالدين والمحيطين في التعامل معاهم وفي المعاني والمسميات التي تطلق على سلوكهم وتعطيه طابع سلبي
..
خلي توقعاتك من طفلك منطقية ومناسبة لعمره.. والأم ما تنتظري التغيير بين يوم وليلة بالمثابرة والمحاولة التكرار والتربية اللطيفة بحزم حتصلي ..

#رشا_درويش
#مدرب_حياة
#الوعي_الطفولي
#اكاديمية_رشا_درويش_للامومة_والطفولة
#اللهم_ارنا_الحق_حقا_وارزقنا_إتباعه